എബിൽ ജോസഫ് പാട്ടുപാടി ഹിറ്റാകുകയാണ്
Watch Video
നെടുങ്കണ്ടം: നെടുങ്കണ്ടംകാരൻ യുവാവിന്‍റെ പാട്ടുകൾ സോഷ്യൽ മീഡിയയിൽ വൈറലാകുകയാണ്. നെടുങ്കണ്ടം കട്ടക്കയത്തിൽ എബിൻ ജോസഫിന്റെ പാട്ടുകളാണ് ഹൈറേഞ്ചിന്‍റെ മലനിരകളും താണ്ടി സോഷ്യൽ മീഡിയയുടെ വിശാലതയിലേക്ക് കുതിക്കുന്നത്.
സംഗീതം ശാസ്ത്രീയമായി അഭ്യസിച്ചിട്ടില്ലാത്ത എബിൻ ഇന്‍റർനെറ്റിൽനിന്നും ട്യൂട്ടോറിയലുകൾ ഡൗണ്ലോഡ് ചെയ്താണ് മനോഹരമായ പാട്ടുകൾ പാടുന്നത്. ഇതുവരെ ഇരുപതോളം പാട്ടുകൾ പാടിയതിൽ പകുതിയും ഹിറ്റാണ്. എഫ്.ബി ലൈവായാണ് മിക്ക ഗാനങ്ങളും എബിൻ പാടിയിട്ടുള്ളത്. ഇതിന് വൻ സ്വീകാര്യതയാണ് ലഭിക്കുന്നത്.
നെടുങ്കണ്ടം പടിഞ്ഞാറേക്കവലയിലെ കവിത കോൾഡ് സ്റ്റോറേജ് ഉടമയായ എബിൻ പകലന്തിയോളമുള്ള കടയിലെ ജോലികൾക്കുശേഷം പാതിരാത്രിയിലാണ് മിക്കപ്പോഴും സംഗീത പരിശീലനം നടത്തുന്നത്. ഉറക്കമിളച്ചുള്ള പരിശീലനങ്ങൾക്ക് ഫലമായി ഹൈ ലോ റേഡിയോയുടെ മ്യൂസിക്ക് കോന്പറ്റീഷനിൽ കേരളത്തിൽനിന്നുള്ള 250 യുവഗായകരിൽനിന്നും തിരഞ്ഞെടുക്കപ്പെട്ട പത്തുപേരിൽ ഒരാളായി എബിൻ മാറി.
ജൂലൈ 31ന് കടവന്ത്രയിൽ നടക്കുന്ന സൂപ്പർ ഫൈനൽ മൽസരത്തിനായുള്ള ഒരുക്കത്തിലാണ് എബിൻ. കൂട്ടുകാരുടെയും അമ്മ ലൈയ്സാമ്മയുടെയും സഹോദരൻ സ്റ്റെഫിന്‍റെയും അകമഴിഞ്ഞ പ്രോൽസാഹനമാണ് തന്‍റെ ഉൗർജമെന്ന് നെടുങ്കണ്ടത്തിന്‍റെ സ്വന്തം കലാകാരൻ പറയുന്നു.
