ബിജെപിയും സിപിഎമ്മും കൊലപാതകങ്ങൾക്ക് ഉത്തരം പറയണം: ഉമ്മൻചാണ്ടി
നെടുങ്കണ്ടം: ഇന്ദിരാഗാന്ധി ജന്മശതാബ്ദി ആഘോഷങ്ങളുടെ ഭാഗമായി കോണ്ഗ്രസ് സംഘടിപ്പിച്ച ബൂത്തുതല കുടുംബസംഗമങ്ങൾ മുൻ മുഖ്യമന്ത്രി ഉമ്മൻചാണ്ടി ഉദ്ഘാടനംചെയ്തു. കേന്ദ്രം ഭരിക്കുന്ന ബിജെപിയും കേരളം ഭരിക്കുന്ന സിപിഎമ്മും രാഷ്ടീയ കൊലപാതകങ്ങൾക്ക് ഉത്തരം നൽകണമെന്നും ഇരുവരും ആയുധമെടുത്ത് ഏറ്റുമുട്ടുന്പോൾ വിലക്കയറ്റം, നിയമവാഴ്ച എന്നിവ ചർച്ച ചെയ്യപ്പെടാതെ പോകുകയാണെന്നും ഉമ്മൻചാണ്ടി പറഞ്ഞു. ചെമ്മണ്ണാറിൽ ജില്ലാതല കുടുംബസംഗമം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം.
നൂറുകണക്കിന് പ്രവർത്തകരാണ് പരിപാടിയിൽ പങ്കെടുത്തത്. ചെമ്മണ്ണാർ, കുഴിക്കൊന്പ്, മുണ്ടിയെരുമ, കരുണാപുരം, അച്ചൻകാനം, കുങ്കിരിപ്പെട്ടി എന്നീ സ്ഥലങ്ങളിൽ നടന്ന കുടുംബസംഗമങ്ങളിലാണ് ഉമ്മൻചാണ്ടി പങ്കെടുത്തത്.
മുതിർന്ന കോണ്ഗ്രസ് പ്രവർത്തകരെ ചടങ്ങിൽ ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം കരസ്ഥമാക്കിയ വിദ്യാർഥികൾക്ക് പ്രിയദർശിനി അവാർഡ് നൽകി.
ഇന്ദിരാഗാന്ധി ജന്മശതാബ്ദി സ്മരണക്കായി ചെമ്മണ്ണാറിൽ ഉമ്മൻ ചാണ്ടി വൃക്ഷത്തൈ നട്ടു. ഡിസിസി പ്രസിഡന്‍റ് ഇബ്രാഹിംകുട്ടി കല്ലാർ, മുൻ ഡിസിസി പ്രസിഡന്‍റുമാരായ റോയി കെ. പൗലോസ്, ജോയി തോമസ്, പി.ടി. തോമസ് എംഎൽഎ, കെപിസിസി ജനറൽ സെക്രട്ടറി മണ്‍വിള രാധാകൃഷ്ണൻ, ബ്ലോക്ക് പഞ്ചായത്ത് പ്രസിഡന്‍റ് ശ്രീമന്ദിരം ശശികുമാർ, ജില്ലാ പഞ്ചായത്ത് പ്രസിഡന്‍റ് കൊച്ചുത്രേസ്യ പൗലോസ്, യൂത്ത് കോണ്ഗ്രസ് സംസ്ഥാന പ്രസിഡന്‍റ് ഡീൻ കുര്യക്കോസ്, യൂത്ത് കോണ്ഗ്രസ് അഖിലേന്ത്യ സെക്രട്ടറി മാത്യു കുഴൽനാടൻ, ഡിസിസി ഭാരവാഹികളായ എം.എൻ. ഗോപി, ജി. മുരളീധരൻ, സേനാപതി വേണു, സി.എസ്. യശോധരൻ എന്നിവർ പരിപാടിയിൽ പങ്കെടുത്തു.
