മലങ്കര ജലാശയത്തിന്‍റെ മൂന്നു ഷട്ടറുകൾ തുറന്നു
തൊടുപുഴ: കനത്ത മഴയിൽ സംഭരണ ശേഷി കവിഞ്ഞതിനെ തുടർന്ന് മലങ്കര ജലാശയത്തിന്‍റെ മൂന്നു ഷട്ടറുകൾ തുറന്നു. ആറ് ഷട്ടറുകൾ ഉള്ളതിൽ നാല് ഷട്ടറുകളാണ് ഇന്നലെ ഘട്ടംഘട്ടമായി തുറന്നു വിട്ടത്.
ഒന്നാം നന്പർ ഷട്ടർ 30 സെന്‍റീ മീറ്ററും മറ്റ് മൂന്ന് ഷട്ടറുകൾ 50 സെന്‍റീമീറ്റർ വീതവുമാണ് തുറന്ന് വിട്ടത്. 42 മീറ്റർ പരമാവധി സംഭരണ ശേഷിയുള്ള ഡാമിലെ ജലനിരപ്പ് 40.90 എത്തിയതോടെയാണ് രാവിലെ ആദ്യ ഷട്ടർ തുറന്നത്. വീണ്ടും ജലനിരപ്പ് ഉയർന്നതോടെ ഉച്ചയ്ക്കു ശേഷം മറ്റ് മൂന്നു ഷട്ടറുകൾ കൂടി തുറക്കുകയായിരുന്നു. നിലവിൽ ഇന്നലെ വൈകിട്ടത്തെ ജലനിരപ്പ് 41.20 മീറ്ററായിരുന്നു. ജലനിരപ്പ് വീണ്ടും ഉയർന്നാൽ ബാക്കി രണ്ട് ഷട്ടറുകൾ കൂടി ഉയർത്തും. 42 മീറ്ററാണ് അണക്കെട്ടിന്‍റെ സംഭരണ ശേഷി. വൃഷ്ടി പ്രദേശത്തു കനത്ത മഴ പെയ്താൽ ജലനിരപ്പ് 41 മീറ്റർ ഉയരുന്പോൾ ഷട്ടറുകൾ തുറക്കും.
ജലസേചന പദ്ധതിക്കായി നിർമിച്ചിരിക്കുന്ന ഡൈവേർഷൻ ഡാം എന്ന നിലയിൽ ജലനിരപ്പ് ഒരു പരിധിയിൽ കൂടുതൽ ഉയർത്താൻ കഴിയില്ല. പ്രധാനമായും മൂലമറ്റം പവർഹൗസിലെ വൈദ്യുതോൽപാദനത്തിന് ശേഷം പുറന്തള്ളുന്ന ജലം ഇവിടെ ശേഖരിച്ചാണ് ഒട്ടേറെ പഞ്ചായത്തുകളിലെ ജലവിതരണത്തിനും ഡാമിനോട് ചേർന്നുള്ള വൈദ്യുതോൽപാദന പദ്ധതിക്കും ഉപയോഗിക്കുന്നത്. ജൂണ്‍ മുതൽ ഡിസംബർ വരെയുള്ള മാസങ്ങളിൽ കനാലിലൂടെയുള്ള ജലവിതരണം പൂർണമായും നിർത്തിവയ്ക്കും.
മഴ കനത്താൽ കുളമാവ്, മൂലമറ്റം, വെള്ളിയാമറ്റം, കാഞ്ഞാർ തുടങ്ങിയ ഉയർന്ന പ്രദേശങ്ങളിൽ നിന്നുള്ള ജലമാകെ അണക്കെട്ടിലേയക്ക് ഒഴുകിയെത്തും. താരതമ്യേന മറ്റു ഡാമുകളെ അപേക്ഷിച്ച് സംഭരണ ശേഷിയും വൃഷ്ടിപ്രദേശവും കുറവുള്ള മലങ്കര ഡാമിൽ പെട്ടെന്ന് ജലനിരപ്പ് ഉയരാൻ ഇത് കാരണമാകും. മൂന്നു വർഷം മുൻപ് ഇത്തരം പ്രദേശങ്ങളിൽ ഉരുൾപൊട്ടിയതിനെ തുടർന്ന് ഡാം തുറന്ന് വിട്ടത് സമീപപ്രദേശങ്ങളിലും നഗരത്തിലുമാകെ വെള്ളം കയറാൻ കാരണമായിരുന്നു. നഗരത്തിൽ പൂർണമായി ഗതാഗതവും തടസപ്പെ
ട്ടിരുന്നു. നഗരത്തിൽ മൂപ്പിൽ കടവ് പാലത്തിലും വെള്ളം കയറിയിരുന്നു. മൂലമറ്റം പവർഹൗസിൽ വൈദ്യുതോൽപാദനം മുന്നറിയിപ്പില്ലാതെ കൂട്ടിയാലും ഡാം തുറക്കേണ്ട സ്ഥിതി വരും. ഷട്ടറുകൾ ഭാഗികമായി തുറന്നു വിടുന്നത് ഡാമിന് താഴെ താമസിക്കുന്നവർക്ക് ബുദ്ധിമുട്ട് ഉണ്ടാക്കില്ല. എന്നാൽ വെള്ളം ക്രമാതീതമായി ഉയർന്നതിന് ശേഷം ഡാം തുറക്കുന്പോൾ കൂടുതൽ ഷട്ടറുകൾ തുറക്കേണ്ടി വരും. ഇത് പ്രദേശത്ത് വെള്ളം കയറുന്നതിനും ഗതാഗതം തടസപ്പെടുന്നതിനും കാരണമാകുകയും ചെയ്യും. ഇതുണ്ടാകാതിരിക്കാനാണ് ജലനിരപ്പ് ആനുപാതിമായി തുറന്നുവിട്ട് സംഭരണശേഷി നിലനിർത്തുന്നത്.
മഴ തുടരുന്ന സാഹചര്യത്തിൽ ഷട്ടറുകൾ കൂടുതൽ ഉയർത്തേണ്ടി വരുമെന്നതിനാൽ തൊടുപുഴയാറിന് ഇരു കരകളിലും താമസിക്കുന്നവർ ജാഗ്രത പാലിക്കണമെന്ന് അധികൃതർ അറിയിച്ചു.
