ഉമ്മൻ ചാണ്ടി എത്തി; പരിദേവനങ്ങളുമായി ആയിരങ്ങളും
| രാജകുമാരി: ചിന്നക്കനാൽ, ശാന്തന്പാറ പഞ്ചായത്തുകളിൽ കാട്ടാനയാക്രമണം രൂക്ഷമായ സ്ഥലങ്ങളിൽ മുൻ മുഖ്യമന്ത്രി ഉമ്മൻചാണ്ടി സന്ദർശനം നടത്തി. ജൂണ്‍ ഒന്പതിന് കാട്ടാനയാക്രമണത്തിൽ കൊല്ലപ്പെട്ട സിങ്കുകണ്ടം നടയ്ക്കൽ സുനിൽ ജോർജിന്റെ വീട്ടിലാണ് ഉമ്മൻ ചാണ്ടി ആദ്യം എത്തിയത്. ഇന്നലെ രാവിലെ പതിനൊന്നരയോടെ ഇവിടെയെത്തിയ ഉമ്മൻചാണ്ടി സുനിലിന്‍റെ മാതാവ് മേരി, ഭാര്യ അഞ്ജു, മക്കളായ അഭിജേഷ്, അഭിനയ എന്നിവരെ അനുശോചനം അറിയിച്ചു. സുനിലിന്‍റെ കുടംബത്തിന് സർക്കാരിൽനിന്നും ലഭിക്കാനുള്ള നഷ്ടപരിഹാരതുക സംബന്ധിച്ച വിവരം ഉടൻ സർക്കാരിന്‍റെ ശ്രദ്ധയിൽ കൊണ്ടുവരുമെന്ന് ഉമ്മൻചാണ്ടി അറിയിച്ചു. അഞ്ജുവിന് സർക്കാർ ജോലി നൽകണമെന്നുള്ള കുടുംബാംഗങ്ങളുടെയും നാട്ടുകാരുടെയും ആവശ്യവും സർക്കാരിനെ അറിയിക്കുമെന്ന് അദ്ദേഹം ഉറപ്പുനൽകി. ഉമ്മൻചാണ്ടി എത്തുന്നതറിഞ്ഞ് കാട്ടാനയാക്രമണത്തിൽ പരിക്കേറ്റവരും ദേഹണ്ഡങ്ങൾ നശിച്ചവരുമുൾപ്പെടെ നൂറുകണക്കിനാളുകളാണ് സിങ്കുകണ്ടത്ത് എത്തിയത്. പരാതികളും നിവേദനങ്ങളും സ്വീകരിച്ച അദ്ദേഹം എല്ലാം സർക്കാരിന്‍റെ ശ്രദ്ധയിൽപെടുത്തുമെന്നറിയിച്ചു. തുടർന്ന് ശാന്തന്പാറ പഞ്ചായത്തിലെ ചെന്പാല, മുള്ളൻതണ്ട് മേഖലകളിൽ കാട്ടാനയാക്രമണത്തിൽ വീടും ദേഹണ്ഡങ്ങളും നഷ്ടപ്പെട്ടവരെയും അദ്ദേഹം സന്ദർശിച്ചു. ഏതാനും ദിവസംമുന്പ് ഒറ്റയാന്‍റെ ആക്രമണത്തിൽ പൂർണമായും തകർന്ന ബാലു, പാണ്ടി എന്നിവരുടെ വീടുകളിൽ ഉമ്മൻചാണ്ടിയെത്തി കാര്യങ്ങൾ ചോദിച്ചറിഞ്ഞു. പൂപ്പാറയിൽനിന്നും മൂന്നുകിലോമീറ്ററോളം ദുർഘടമായ പാതയിൽ ജീപ്പിൽ സഞ്ചരിച്ചാണ് അദ്ദേഹം ചെന്പാലയിലെത്തിയത്. ജില്ലാപഞ്ചായത്ത് പ്രസിഡന്‍റ് കൊച്ചുത്രേസ്യ പൗലോസ്, ഡിസിസി പ്രസിഡന്‍റ് ഇബ്രാഹിംകുട്ടി കല്ലാർ, മുൻ ഡിസിസി പ്രസിഡന്‍റ് റോയി കെ. പൗലോസ്, സേനാപതി വേണു, മാത്യു കുഴൽനാടൻ, ഡീൻ കുര്യാക്കോസ് എന്നിവരും മറ്റു ജനപ്രതിനിധികളും അദ്ദേഹത്തോടൊപ്പമുണ്ടായിരുന്നു. കാട്ടാനയാക്രമണം നടന്ന സ്ഥലങ്ങൾ സന്ദർശിച്ച് മടങ്ങുംവഴി എസ്റ്റേറ്റ് പൂപ്പാറയിലെത്തിയ ഉമ്മൻചാണ്ടിക്ക് നൂറുകണക്കിനാളുകൾ സ്വീകരണം നൽകി. |
