ദേശീയ ഹരിത ട്രൈബ്യൂണലിന്‍റെ ചിറകരിഞ്ഞു
ന്യൂഡൽഹി: ദേശീയ ഹരിത ട്രൈബ്യൂണലിന്‍റെ സുപ്രധാനമായ ജുഡീഷൽ അധികാരങ്ങളിൽ വെള്ളം ചേർത്തുകൊണ്ട് കേന്ദ്ര സർക്കാർ വിജ്ഞാപനം ചെയ്തു. പുതിയ ഭേദഗതി അനുസരിച്ച് ജഡ്ജിമാർ അല്ലാത്തവർക്കും ഇനി ട്രൈബ്യൂണൽ അധ്യക്ഷനാകാം. രാജ്യത്തെ മുഴുവൻ ദേശീയ ട്രൈബ്യൂണൽ തലവന്മാരുടെയും കാലാവധി മൂന്നു വർഷമായി ഏകീകരിച്ചിട്ടുമുണ്ട്.
ഹരിത ട്രൈബ്യൂണൽ, സെൻട്രൽ അഡ്മിനിസ്ട്രേറ്റീവ് ട്രൈബ്യൂണൽ എന്നിവ ഉൾപ്പെടെ 19 ട്രൈബ്യൂണലുകളുടെ ചെയർപേഴ്സണ്‍, അംഗങ്ങൾ എന്നിവരുടെ യോഗ്യതാ ചട്ടങ്ങളിൽ കേന്ദ്രസർക്കാർ ഭേദഗതി വരുത്തിയതു വൻകിട കോർപറേറ്റ് ലോബികളുടെ താത്പര്യപ്രകാരമാണെന്ന് ആരോപണം ഉയർന്നിട്ടുണ്ട്.
കേന്ദ്ര വിജ്ഞാപനത്തിലെ ഭേദഗതി പ്രകാരം ജഡ്ജിമാരല്ലാത്തവർക്കും ഹരിത ട്രൈബ്യൂണൽ ചെയർപേഴ്സണ്‍ ആകാം. പരിസ്ഥിതി വിഷയങ്ങളിൽ കുറഞ്ഞത് അഞ്ചു വർഷവും അഭിഭാഷക വൃത്തിയിൽ 25 വർഷവും പ്രവൃത്തിപരിചയമുള്ളവർക്കു ഹരിത ട്രൈബ്യൂണൽ ചെയർപേഴ്സണ്‍ ആകാൻ ഇനി യോഗ്യതയുണ്ടാകും.
ജുഡീഷൽ അംഗമായോ വിദഗ്ധ അംഗമായോ മൂന്നു വർഷം പ്രവർത്തിച്ചവർക്കും ഇനിമുതൽ അധ്യക്ഷനാകാനും യോഗ്യതയുണ്ടാകും. ഇതുവരെ ഉണ്ടായിരുന്ന സുപ്രീം കോടതി മുൻ ജഡ്ജി, ഹൈക്കോടതി മുൻ ചീഫ് ജസ്റ്റീസ് എന്നിവർക്കു പുറമേയാണ് പുതിയ യോഗ്യതാ നിബന്ധനകൾ.
ഇതനുസരിച്ച് ഉന്നത ജഡ്ജിയായി പ്രവർത്തിക്കാത്തവരെയും ദേശീയ ഹരിത ട്രൈബ്യൂണൽ അധ്യക്ഷനായി നിയമിക്കാനാകും. സുപ്രീംകോടതി മുൻ ജഡ്ജിയോ ഹൈക്കോടതി മുൻ ചീഫ് ജസ്റ്റീസോ അധ്യക്ഷനായാൽ മാത്രമേ ട്രൈബൂണലിനു ജുഡീഷൽ അധികാരം നിലനിർത്താനാവുകയുള്ളൂ എന്ന് നിയമവിദഗ്ധർ ചൂണ്ടിക്കാട്ടി.
പരിസ്ഥിതി വിഷയങ്ങളിൽ അഞ്ചു വർഷത്തെ പരിചയമുള്ള മുതിർന്ന അഭിഭാഷകനെ ട്രൈബ്യൂണൽ ചെയർമാനായി നിയമിച്ചാൽ ഇപ്പോഴത്തേതു പോലുളള അധികാരം ട്രൈബ്യൂണലിന് ഉണ്ടാകില്ല. സുപ്രീംകോടതിയിലെ മുൻ ജ്ഡ്ജിമാരെയാണ് അധ്യക്ഷനായി നിയമിച്ചുവന്നിരുന്നത്.
കേന്ദ്ര സർവീസിലോ സംസ്ഥാന സർവീസിലോ കുറഞ്ഞത് 20 വർഷത്തെ പ്രവൃത്തിപരിചയവും പരിസ്ഥിതി വിഷയങ്ങൾ കൈകാര്യം ചെയ്ത് അഞ്ചു വർഷത്തെ പരിചയവുമുള്ള ഉദ്യോഗസ്ഥർക്ക് ദേശീയ ഹരിത ട്രൈബ്യൂണൽ അംഗങ്ങളാകാമെന്നും ഭേദഗതിയിൽ പറയുന്നു. ഇതനുസരിച്ച് ഐഎഎസ് ഉദ്യോഗസ്ഥരും മുതിർന്ന അഭിഭാഷകരും അടക്കമുള്ളവർ ട്രൈബൂണലിൽ അംഗങ്ങളായെത്തും.
പുതിയ ഭേദഗതി പ്രകാരം മുഴുവൻ ട്രൈബ്യൂണൽ ചെയർപേഴ്സണ്‍മാരുടെയും സേവന കാലാവധി മൂന്നു വർഷമായിരിക്കും. ഇൻഡസ്ട്രിയൽ ട്രൈബ്യൂണൽ, കടം വീണ്ടെടുക്കൽ ട്രൈബ്യൂണൽ എന്നിവ ഒഴികെയുള്ള മറ്റ് ട്രൈബ്യൂണലുകളുടെയെല്ലാം അധ്യക്ഷന്മാരുടെ മാസശന്പളം രണ്ടര ലക്ഷം രൂപയായും ഏകീകരിച്ചു. ട്രൈബ്യൂണൽ അംഗങ്ങളുടെ പ്രതിമാസ പ്രതിഫലം 2.25 ലക്ഷം രൂപയുമാണ്.
