ദൃശ്യവിരുന്നൊരുക്കി അഞ്ചുരുളി; അപകട ഭീഷണിക്ക് മറയില്ല
ഉപ്പുതറ : പ്രകൃതിരമണീയത നിറഞ്ഞ അഞ്ചുരുളി വിനോദസഞ്ചാര കേന്ദ്രത്തിലെത്തുന്ന സഞ്ചാരികളുടെ സാഹസീയത അപകടം വിളിച്ചുവരുത്തുന്നതാണെങ്കിലും അപകട സാധ്യത ഒഴിവാക്കൻ സംവിധനങ്ങളൊന്നുമില്ല.
തടാകത്തിന്‍റെ തിട്ടയിലും വഴുവഴുപ്പുള്ള പാറയിലും കയറിയിരിക്കുന്നതും സെൽഫി എടുക്കുന്നതുമാണ് അപകടം ക്ഷണിച്ചുവരുത്തുന്നത്. പ്രകൃതിരമണീയതകൊണ്ട് അനുഗ്രഹീതമായ പ്രദേശമാണ് അഞ്ചുരുളി. തുരങ്കത്തിലൂടെ ഒഴുകിയെത്തുന്ന സ്പടികം പോലെയുള്ള വെള്ളം മലമുകളിൽ നിന്നും തടാകത്തിലേക്ക് പതിക്കുന്പോൾ പാൽ നുര ചിതറും. കാലവർഷം ആരംഭിച്ചപ്പോൾ മുതൽ അഞ്ചുരുളി കൂടുതൽ മനോഹരിയായി. വിശാലമായിക്കിടക്കുന്ന തടാകം. ചുറ്റും പച്ചപ്പുതച്ച വനപ്രദേശം ഇവയെല്ലാം ഏറെ ആസ്വദ്യകരമാണ്. അതിനാൽ തന്നെ ഇവിടേക്കുള്ള വിനോദ സഞ്ചാരികളുടെ ഒഴുക്കും കൂടുതലാണ്. ഇവിടെ അപകടഭീഷണിയുള്ള പ്രദേശങ്ങളും നിരവധിയുണ്ട്.
ഇടുക്കി അണക്കെട്ടിന്‍റെ ഭാഗമായ തടാകത്തിൽ അഗാധ കയങ്ങളും ഉണ്ട്. ഇതിന് ചുറ്റും വളരെ ഉയരത്തിലുള്ള പാറക്കൂട്ടമാണ്. ഇവിടെയെത്തുന്ന സഞ്ചാരികൾ വിശ്രമിക്കുന്നത് ഈ പാറക്കൂട്ടത്തിന് മുകളിലാണ്. വഴുവഴുപ്പുള്ള പാറയിൽ കാൽ ഒന്ന് വഴുതിയാൽ വലിയ കയത്തിലേക്കാണ് പതിക്കുക. ടണൽ മുഖത്ത് ജലനിരപ്പ് ഉയർന്ന് കഴിഞ്ഞു. ടണലിൽ നിന്നും വെള്ളം തടാകത്തിലേക്ക് പതിക്കുന്ന ഭാഗത്താണ് സഞ്ചാരികൾ കൂട്ടമായി എത്തി അപകടകരമായ തരത്തിൽ ഫോട്ടോയെടുപ്പും മറ്റും നടത്തുന്നത്. ഇത് വലിയ ദുരന്ത സാധ്യത ഉണ്ടാക്കുന്നതാണ്. പെണ്‍കുട്ടികളും ആണ്‍കുട്ടികളുമുൾപ്പെടെയുള്ളവരാണ് അപകടകരമായ സ്ഥലത്ത് സെൽഫി എടുത്ത് രസിക്കുന്നത്. മിക്കസമയങ്ങളിലും ഇവിടെ പ്രദേശവാസികൾ ആരും ഉണ്ടാകാറില്ല.
അതിനാൽ അപകടം നടന്നാൽ വളരെ സമയം കഴിഞ്ഞേ മറ്റുള്ളവർ അറിയു. വഴുവഴുപ്പുള്ള പറയുടെ മുകളിൽകൂടി ശക്തിയായി ഒഴുക്കുള്ള വെള്ളത്തിൽ സാഹസിക പ്രകടനം നടത്തുന്നവരുമുണ്ട്. തടകത്തിന്‍റെയും ടണലിന്‍റെയും തിട്ടയിടിഞ്ഞ് ഇരിക്കുകയുമാണ്. ഇവിടെ കയറിനിൽക്കരുതെന്ന് നാട്ടുകാർ ബോർഡ് വെച്ചിട്ടുണ്ടങ്കിലും ഇതെല്ലാം സഞ്ചാരികൾ അവഗണിക്കുകയുമാണ്. തടാകത്തിനും ടണൽ മൂഖത്തിന് ചുറ്റും ചുറ്റുവേലി കെട്ടണമെന്ന ആവശ്യം ശക്തമാണെങ്കിലും അധികൃതർ മുഖവിലയ്ക്കെടുത്തിട്ടില്ല.
