പാചകവാതക സിലണ്ടർ പൊട്ടിത്തെറിച്ച സംഭവത്തിൽ അന്വേഷണമില്ല
അണക്കര: ഒരിക്കലും പൊട്ടില്ലെന്നു പറയുന്ന പാചകവാതക സിലണ്ടർ പൊട്ടിത്തെറിച്ചിട്ട് അന്വേഷണം കന്പനി തലത്തിൽമാത്രം. സംസ്ഥാനത്ത് ഒരുകോടിയിലേറെ ഉപഭോക്താക്കളുള്ള എൽപിജി (ഗാർഹിക പാചക വാതകം) സിലണ്ടർ പൊട്ടിത്തെറിച്ചിട്ട് സാധാരണ ഒരു സംഭവം എന്ന നിലയിലുള്ള അലസമനോഭാവമാണ് സർക്കാരിന്‍റെ ബന്ധപ്പെട്ട വകുപ്പുകളുടേത്.
ഞായറാഴ്ച പുലർച്ചെ 5.45-ന് അണക്കര അന്പലമേട് പുലിപാറ സജീവന്‍റെ വീട്ടിലുണ്ടായിരുന്ന ഗ്യാസ് സിലണ്ടർ പൊട്ടിത്തെറിക്കുകയായിരുന്നു. വീട്ടുകാരുടെ ആയുസിന്‍റെ ദൈർഘ്യംകൊണ്ട് ജീവഹാനിയിൽനിന്നും രക്ഷപെട്ടതൊഴിച്ചാൽ പാചക വാതകം ഉപയോഗിക്കുന്നവരുടെ ഭീതി ഒഴിഞ്ഞിട്ടില്ല.
രാത്രിയിൽ സ്ഫോടനം നടന്ന അടുക്കളയുടെ സമീപത്തുള്ള മുറിയിൽ ഉറങ്ങാൻപോയ സജീവനും ഭാര്യയും രണ്ടുമക്കളും സ്ഫോടനശബ്ദം കേട്ടാണ് ഉണർന്നത്. സ്ഫോടനം ഉണ്ടാകുന്പോൾ അടുക്കളയിൽ ആരുമുണ്ടായിരുന്നില്ലെന്നതും അടുക്കളയുമായി ബന്ധമില്ലാത്ത മുറിയിലായിരുന്നു ആളുകൾ എന്നതിനാലുമാണ് വലിയ ദുരന്തം ഒഴിവായത്.
ദുരന്തങ്ങൾക്കുമുന്പേ സാധ്യതയറിഞ്ഞ് മുൻകരുതൽ സ്വീകരിക്കുന്നതിനുപകരം ദുരന്തത്തിനുശേഷം കണ്ണീർ പൊഴിക്കുകയും ആരോപണങ്ങളും അന്വേഷണങ്ങളും പ്രഖ്യാപിക്കുകയുംചെയ്യുന്ന സമീപനം തന്നെയാണ് ഇക്കാര്യത്തിലും ഉണ്ടായിരിക്കുന്നത്. സംഭവം നടന്നശേഷം കുറഞ്ഞത് ഒരു ഫോറൻസിക് പരിശോധനപോലും നടത്താൻ ആരും തയാറായിട്ടില്ല. ഗ്യാസ് കന്പനിയുടെ എക്സിക്യൂട്ടീവ് ആഴ്ച ഒടുക്കത്തോടെ സ്ഥലത്തെത്തുമെന്നാണ് ലഭിക്കുന്ന വിവരം.
സിലണ്ടിറിനുപുറത്ത് ചൂടുകൂടി ഗ്യാസിന്‍റെ പ്രഷർ ഉയർന്നാൽ മാത്രമേ സിലണ്ടർ പൊട്ടുകയുള്ളെന്ന് ഗ്യാസ് കന്പനി അധികൃതർ ആണയിടുന്നു. സിലണ്ടർ ചൂടാകാനുള്ള യാതൊരു സാഹചര്യവും പുറത്തുകാണാനില്ല. അണക്കരയിലെ ഒരു പച്ചക്കറി കടയിലെ ജീവനക്കാരനായ സജീവൻ കട അടച്ചശേഷം രാത്രി പത്തിനോടെ വീട്ടിൽവന്ന് അടുക്കള പൂട്ടി ഉറങ്ങാനായി പോയി എന്നാണു പറയുന്നത്. അടുക്കളയിൽ മറ്റേതെങ്കിലും വസ്തുവിനു തീപിടച്ച് ഗ്യാസ് ചൂടാകാനുള്ള സാധ്യതയും ഇല്ലെന്നാണ് പ്രാഥമിക നിഗമനം.
രാത്രി പത്തിന് അടുക്കള അടക്കുന്പോൾ ഉള്ളിൽ ഏതെങ്കിലും തീ അണയാതെ ഉണ്ടായിരുന്നെങ്കിൽ രാവിലെ 5.45-നു മുന്പുതന്നെ തീ പടർന്ന് അടുക്കള കത്തിനശിക്കുമായിരുന്നു. മണ്‍കട്ടയും അടച്ചുറപ്പില്ലാത്ത കതകും ജനലും ടിൻഷീറ്റുകൊണ്ടുള്ള മേൽക്കൂരയിൽ ചോർച്ച തടയുന്നതിനായി വിരിച്ചിരുന്ന പ്ലാസ്റ്റിക് ഷീറ്റുമുള്ള മുറിയിൽ ഏഴു മണിക്കൂർ തീ അണയാതെ കത്തിയാൽ തീനാളങ്ങൾ പുറത്തേക്കു വരേണ്ടതാണ്. അതിനുള്ള ലക്ഷണങ്ങൾ കാണാനില്ല.
സിലണ്ടറിന്‍റെ മുകളിൽ റഗുലേറ്റർ ഘടിപ്പിക്കുന്ന ഭാഗം കത്തിയതായുള്ള ലക്ഷണവുമില്ല. 80 കിലോ പ്രഷർ താങ്ങാനുള്ള ശേഷി സിലണ്ടറിനുണ്ടെന്നാണ് ഗ്യാസ് കന്പനി വക്താവ് പറയുന്നത്. സിലണ്ടറിനുള്ളിലേക്ക് തീപോയി ഗ്യാസിനു തീപിടിക്കില്ല. ഓക്സിജന്‍റെ സാമിപ്യത്തിലേ സിലണ്ടറിനുള്ളിൽ ദ്രാവകരൂപത്തിലുള്ള ഗ്യാസ് കത്തുകയുള്ളു. ഉപയോഗത്തിലിരുന്ന സിലണ്ടർ ചോരാനുള്ള സാധ്യതയും കന്പനി അധികൃതർ നിഷേധിക്കുന്നുണ്ട്.
പുറത്തുനിന്നുള്ള തീ സാമിപ്യം ഒന്നുകൊണ്ടുമാത്രമെ സിലിണ്ടർ പൊട്ടിത്തെറിക്കുകയുള്ളു എന്ന് കന്പനി അധികൃതർ സമർഥിക്കുന്പോൾ നഷ്ടപരിഹാരത്തിനുള്ള ഇൻഷ്വറൻസ് സാധ്യതയും അപകടസാധ്യതയും അന്വേഷിക്കേണ്ടതാണ്.
