മികച്ച വിദ്യാർഥി കർഷകയെ അനുമോദിച്ചു
ചെറുതോണി: സംസ്ഥാനത്തെ മികച്ച കർഷക വിദ്യാർഥിനിയായി തെരഞ്ഞെടുക്കപ്പെട്ട അഞ്ജു തോമസിനെ റോഷി അഗസ്റ്റിൻ എംഎൽഎയും പഞ്ചായത്ത് പ്രസിഡന്‍റും ബ്ലോക്ക് ഗ്രാമപഞ്ചായത്ത് ജനപ്രതിനിധികളും വീട്ടിലെത്തി അനുമോദിച്ചു. കൊന്നത്തടി പഞ്ചായത്തിലെ പാറയ്ക്കൽ തോമസ് ജിൻസമ്മ ദന്പതികളുടെ മകളാണ് അഞ്ജു. ബോബി ഏക സഹോദരനാണ്.
ചെറുപ്പംമുതൽ കൃഷിയിൽ താല്പര്യം പ്രകടിപ്പിച്ചിരുന്ന അഞ്ജു അച്ഛനെ സഹായിക്കുന്നതിനായി എല്ലാദിവസവും കൃഷിയിടത്തിൽ എത്തുമായിരുന്നു. രാജകുമാരി എസ്എൻവി എച്ച്എസിൽനിന്നും പ്ലസ് ടു അഗ്രിക്കൾച്ചർ പഠനം പൂർത്തിയാക്കി ബിഎസ്സി അഗ്രികൾച്ചർ പ്രവേശനം കാത്തിരിക്കുകയാണ് ഈ കൊച്ചുകർഷക. തന്‍റെ മൂന്നേക്കർ പുരയിടത്തിൽ വിവിധ പച്ചക്കറികളും പഴവർഗങ്ങളും നാണ്യവിളകളും കൃഷി ചെയ്യുന്നതോടൊപ്പം ആട്, കോഴി, താറാവ് വളർത്തലും പഠനത്തോടൊപ്പം ഏറ്റെടുത്തു ചെയ്തുവരികയാണ്.
വീടിനോടുചേർന്ന് പോളിഹൗസ് നിർമിച്ച് അപൂർവ പച്ചക്കറികളായ കെയ്ൻ, തക്കോയി, ടെത്തിന, നൂൽകോളി, സെലറി, ബെസില്ല, വിവിധ തരം കാബേജുകൾ, 22 ഇനം മുളകുകൾ, പയർ, പൊന്നാർവീരൻ ചീര, മൂന്നുതരം വഴുതനകളും ബീൻസുകളും പുരയിടത്തിലെ കാഴ്ചകളാണ്.
ഓരോ കൃഷിക്കും സമയാസമയങ്ങളിൽ ചെയ്യേണ്ട വളങ്ങളും ജൈവകീടനാശിനികളും അഞ്ജുവിന് മനപാഠമാണ്. പഠനത്തോടൊപ്പം കുടുംബത്തെ സഹായിക്കാനുള്ള വരുമാനംകൂടി കണ്ടെത്തി നൽകാനാകുന്ന സന്തോഷത്തിലാണ് കൃഷി ഓഫീസറാകാൻ ആഗ്രഹിക്കുന്ന അഞ്ജു.
സംസ്ഥാന അവാർഡ് നേടിയപ്പോൾതന്നെ കൃഷിമന്ത്രി വി.എസ്. സുനിൽകുമാർ ഫോണിൽവിളിച്ച് അഭിനന്ദിക്കുകയും തുടർ പഠനത്തിനാവശ്യമായ സഹായം ഉറപ്പുനൽകുകയും ചെയ്തിരുന്നു.
എംഎൽഎയോടൊപ്പം കൊന്നത്തടി പഞ്ചായത്ത് പ്രസിഡന്‍റ് വി.കെ. മോഹനൻ നായർ, ബ്ലോക്ക് പഞ്ചായത്ത് മെന്പർ ടി.പി. മൽക്ക, പഞ്ചായത്ത് വൈസ് പ്രസിഡന്‍റ് ഡോണ സാന്‍റു, പഞ്ചായത്തംഗങ്ങളായ ജെയിംസ് കുളങ്ങര, ഡെയ്സി ജോസ്, മരിയ ഷാജി, ജെസി ജോസഫ് എന്നിവരും അനുമോദിക്കാനെത്തി.
