ഞാറ്റുപാട്ടിന്‍റെ ഈണത്തിനൊത്തു ചുവടുവച്ച് ശനിക്കൂട്ടം കൃഷിയിറക്കി
കട്ടപ്പന : ഞാറ്റുപാട്ടിന്‍റെ ഈണത്തിൽ നൃത്തച്ചുവടുകൾവച്ച് വിദ്യാർഥികളും അധ്യാപകരും പാടത്തിറങ്ങി ഉഴുതു ഞാറുനട്ടു. കട്ടപ്പന ശനിക്കൂട്ടം കൃഷി കൂട്ടായ്മയും പരിസ്ഥിതി സംഘടനയായ ഗ്രീൻലീഫിന്‍റെയും നേതൃത്വത്തിലാണ് കട്ടപ്പന വലിയകണ്ടം പാടത്ത് തുടർച്ചയായി ആറാം തവണയും നെൽകൃഷിയിറക്കിയത്. ഇടുക്കി, കോട്ടയം ജില്ലയിലെ വിവിധ വിദ്യാലയങ്ങളിലെ അഞ്ഞൂറോളം കുട്ടികളും അധ്യാപകരുമാണ് നടീലിന് പാടത്തിറങ്ങിയത്. കട്ടപ്പന ഗവണ്‍മെന്‍റ് കോളജ്, ഗവണ്‍മെന്‍റ് ട്രൈബൽ സ്കൂൾ കട്ടപ്പന, എംഎം എച്ച്എസ് നരിയന്പാറ, നെടുങ്കണ്ടം എംഇഎസ് കോളേജ്, ഗിരിദീപം കോളജ് കോട്ടയം, പണിക്കൻകുടി ഗവണമെന്‍റ് എച്ച്എസ്എസ്, എന്നിവിടങ്ങളിലെ കുട്ടികളും ലബ്ബക്കട യുവധാര എസ്എച്ച്ജിയിലെ അംഗങ്ങളുമാണ് ഞാറുനടീലിന് എത്തിയത്.
ഭക്ഷണം കഴിക്കുന്ന എല്ലാവരും ഭക്ഷ്യോത്പാദനത്തിൽ പങ്കാളികളാകുക എന്ന മുദ്രാവാക്യമുയർത്തിയാണ് യുവതലമുറ മാതൃക കാട്ടിയത്. സന്പുർണ ജൈവകൃഷിരീതിയാണ് അവലംബിക്കുന്നത്. പാൽതോണിയിനത്തിൽപെട്ട വീത്താണ് ഉപയോഗിച്ചത്.
നടീൽ ഉദ്ഘാടനം കട്ടപ്പന നഗരസഭ വിദ്യാഭ്യാസ സ്റ്റാൻഡിംഗ് ചെയർമാൻ മനോജ് എം. തോമസ് നിർവഹിച്ചു. പ്രഫ. സി.പി. റോയി അധ്യക്ഷത വഹിച്ചു. കൗണ്‍സിലർമാരായ സി.കെ. മോഹനൻ, മഞ്ജു സതീഷ്, ടി. ആർ. രമേശ്, റെജി കൊട്ടക്കാട്ട്, ഗവണ്‍മെന്‍റ് കോളജ് പ്രിൻസിപ്പൽ ഡോ. സിൽവിക്കുട്ടി ജോസഫ്, നെടുങ്കണ്ടം എംഇഎസ് ജോളജ് പ്രിൻസിപ്പാൾ എ.എം. റഷീദ് എന്നിവർ പ്രസംഗിച്ചു.
